રિપોર્ટર: મહેન્દ્ર સોલંકી,વડોદરા
ફતેગંજ વિસ્તારની રંગોલી હોટલની પાછળ પાર્ક કરેલી કારમાંથી સયાજીગંજ પોલીસે દરોડો પાડી દારૂની ત્રણ બોટલો, રોકડા ૧.૨૧ લાખ રૂપિયા સહિત ૮.૩૯ લાખની મત્તા કબ્જે કરીને કાર માલિકને વોન્ટેડ જાહેર કર્યો છે. ગઈકાલે સાંજનાં સમયે સયાજીગંજ પોલીસ મથકના જવાનો પેટ્રોલિંગમાં હતા. તે દરમિયાન તેઓને ચોક્કસ બાતમી મળી હતી કે ફતેગંજ મેઈન રોડ પર આવેલી હોટલની પાછળની ગલીમાં પાર્ક કરેલી કારમાં વિદેશી દારૂની બોટલ છે. જેના આધારે પોલીસે દરોડો પાડી તપાસ કરતા કારમાંથી ભારતીય બનાવટની વિદેશી દારૂની રૂપિયા ૮૫૦૦ ની કિંમત ઘરાવતી એક અડઘી અને બે આખી બોટલો,રોકડા રૂપિયા ૧.૨૧ લાખ અને રૂપિયા ૧૦ હજારની કિંમતનો આઈફોન મળી આવ્યો હતો. સયાજીગંજ પોલીસે રૂપિયા ૮.૩૯ લાખની મત્તા કબ્જે કરીને કાર માલિકને વોન્ટેડ જાહેર કર્યો છે. તપાસ કરતા કારમાંથી વીરેન્દ્ર સિંહ રહે.પરમ રેસીડેન્સી ન્યુ સમા રોડ નામનું લાયસન્સ મળી આવ્યું હતું. સયાજીગંજ પોલીસે વિદેશી દારૂની બોટલો રોકડા રૂપિયા મોબાઈલ ફોન અને કાર સહિત રૂપિયા ૮.૩૯.૫૦૦ ની મતા કબજે કરી કાર માલિક વીરેન્દ્ર વિરુદ્ધ પ્રોહીબીશનની કલમો હેઠળ ગુનો નોંધી તેની ઘરપકડના ચક્રો ગતિમાન કર્યા છે.
